اش كنقصدو بالديون؟؟

الطبقات الشعبية فبلادنا كتغرق نهار على نهار فبير بلا قاع ديال الفقر والبطالة والمرض وتقلص الموارد المائية وشلا حويجات آخرين. هاذ الطبقات نيت كتشوف بعينيها ثاني واحد الجزء من الناس فالبلاد عايشين واحد العيشة ديال البذخ اللي مكايتصورش. وحين كينوضو الناس المقهورين يقولو راه خاصنا الخدمة وخاصنا الصحة وخاصنا التعليم وخاصنا الغذاء وخاصنا المحافظة على ثرواتنا المائية والفلاحية وبيئتنا…، كيجيهوم الجواب عامر وعود وكذوب، لكن القوانين (خاصة قانون المالية) هي اللي مكاتكذبش: شلا اموال كتمشي غير فخلاص الكريديات، أموال اكثر من ميزانيات التعليم والصحة وباقي القطاعات الاجتماعية. وحين كيزيدو الناس وكايقولو راه ما بغينا البلاد تبقا ماشية فهاذ الطريق وخاصنا سياسات اخرى، كيجيهوم الجواب ثاني عامر وعود وردية كاذبة، حيث مين كيمشي المواطن يطالع على البرامج ديال الدولة، كيلقاها ترجمة بالعربية لبرامج ملاوها الناس اللي كايتسالو ديك الكريديات، باش يضمنوا أن كريدياتهوم يرجعوا. اطاك بغات تفتح هذا الموضوع، باش نحاولو جميع نفهموه، ونقدرو نناضلو ضدو. شوفو معانا هذا الفيديو الاول من سلسلة فيديوهات الديون: سرطان الديون، كيفاش نتفكو منو